Marcoleta: Kasong plunder plano para ‘di ako makasali sa VP Sara impeachment trial

NANINIWALA si Senador Rodante Marcoleta na ang nakatakdang pagsasampa ng kasong plunder laban sa kanya ay bahagi umano ng planong hadlangan ang kanyang paglahok sa impeachment trial ni Vice President Sara Duterte na nakatakdang magsimula sa Hulyo 6.
Sa kanyang pahayag nitong Martes, Hunyo 30, sinabi ni Marcoleta na hindi niya maipagpapatuloy ang kanyang mga layunin sa Senado kung siya ay maaresto.
“Kapag ako’y kanilang inaresto, hindi na po matutuloy ‘yan. Akala po nila ay maililibing ito sa limot,” anang senador na tinutukoy ang kanyang paglilingkod at pagpapanagot sa mga aniya’y nagkasala.
“Ang isa pa pong inaasahan nila ay hindi na po ako makakasali doon sa impeachment proceedings na nakatakda pong magsimula sa susunod na linggo. Samakatuwid, dalawang ibon sa isang putok, mga kababayan,” dagdag pa ni Marcoleta.
Kinuwestiyon din ni Marcoleta ang umano’y plano na ito ni Ombudsman Jesus Crispin Remulla at ang kaalaman ni Senador Ping Lacson sa naturang kaso.
“So talagang maliwanag na planado po ito, mga kababayan. Kasi dalawang linggo bago nagpahayag ang ating Ombudsman, sinabi na rin ni Ping Lacson na tila siyam pa na senador ang makukulong. Parang alam na niya ang mangyayari,” aniya.
“Gaya po nang nauna ko nang ipinahayag sa inyo, alam kong gagawin nila ito. Alam kong aarestuhin nila ako. Alam kong ikukulong nila ako. Ngunit hindi po dahilan yan para tumigil ako sa paglilingkod sa inyo,” dagdag pa ni Marcoleta.
Matatandaan naman na sinabi ni Remulla na magsasampa ang Office of the Ombudsman ng kasong plunder laban kay Marcoleta sa Sandiganbayan kaugnay ng umano’y P75 milyong campaign donations na kanyang natanggap. (Nino Aclan)